कांग्रेस–एमालेले जिते पनि काम माओवादीकै गर्नुपर्छ : प्रचण्ड

काठमाडौं । माओवादी केन्द्रका अध्यक्ष पुष्पकमल दाहाल ‘प्रचण्ड’ले स्थानीय तहको निर्वाचनमा कांग्रेस, एमाले लगायतका जुनसुकै दल र उम्मेदवारले जिते पनि काम माओवादीकै गर्न बाध्य हुने बताउनु भएको छ ।

काठमाडौंमा सोमबार दिउँसो माओवादी केन्द्रमा प्रवेश गर्ने नेता–कार्यकर्तालाई सम्बोधन गर्दै दाहालले भन्नुभयो, ‘भर्खरै छवटा प्रदेशमा स्थानीय तहको निर्वाचन सम्पन्न भएको छ । हामीले निर्वाचनमा अपेक्षाअनुसार जित्न सकेनौं ।’

उहाँले भन्नुभयो, ‘तर, माओवादी विचार, राजनीति र एजेण्डाले जितेको छ । निर्वाचनमा कांग्रेस, एमाले लगायतका दल र उम्मेदवारले जिते पनि उनीहरूले काम माओवादीकै गर्नु पर्नेछ ।’

संघीयता, गणतन्त्र र स्थानीय सरकारको माओवादी एजेण्डाभन्दा बाहिर गएर कांग्रेस र एमालेसहितका दलहरूले काम गर्न नमिल्ने दाहालले बताउनुभयो । ‘जित्न त उनीहरूले जिते । तर, काम हाम्रो गर्छन्, गर्न बाध्य छन्’, उहाँले भन्नुभयो ।

प्रचण्डले स्थानीय तहमा माओवादीले जित्दा सुनमा सुगन्ध हुने बताउँदै ढिलो वा चाँडो सबै माओवादीहरू एक ठाउँ आएर देशको नेतृत्व लिनुपर्ने बताउनु भयो ।

प्रचण्डले भन्नुभयो, ‘सबै माओवादी घर फर्किनुको बिकल्प छैन । बाबुरामजी पनि छिट्टै फर्कनुपर्छ, सबै नेता फर्केपछि एक्लै फर्कनुको अर्थ पनि रहँदैन । वैद्यजी, विप्लवजी पनि फर्कनैपर्छ, अन्त जाने कुनै ठाउँ छैन । सबै माओवादी मिलेर मात्रै परिवर्तनलाई संस्थागत गर्न सकिन्छ ।’

LEAVE COMMENT

Comment *
Your Name *
Email *
Website
 

Related Posts
Don't miss it
Editors choice