चैतमा स्थानीय तहको निर्वाचन हुन्छ– मन्त्री थापा

पोखरा । स्वास्थ्यमन्त्री गगन थापाले चैत महिनामा स्थानीय तहको निर्वाचन हुने निश्चित रहेको बताएका छन् ।

विपी कोइरालाको १०२ औं जन्मजयन्तीको अवसरमा नेपाली काँग्रेस कास्कीद्वारा आयोजना गरेको कार्यक्रमलाई सम्बोधन गर्दै उनले निर्वाचनका लागि सरकारले विधेयक बनाएर व्यवस्थापिका–संसद्मा पेस गरेको जानकारी गराए ।

स्थानीय तहमा गाउँपालिका र नगरपालिका ७०० देखि ७५० सम्मको हाराहारीमा बनाउन उपयुक्त हुने धारणा राख्दै मन्त्री थापाले तर यसको निधो गर्न केही समय लाग्ने बताए ।

नेपाली काँग्रेसका केन्द्रीय सदस्यसमेत रहनुभएका मन्त्री थापाले अब चुनाव हुन्छ कि हुदँैन भने अलमलमा नपरी तयारी अवस्थामा रहन पार्टी कार्यकर्तालाई आग्रह गरे ।

देशका विशिष्ट व्यक्ति र सर्वसाधारण नेपाली जनताको अधिकार समान भएको बताउँदै स्वास्थ्यमन्त्री थापाले विशिष्ट व्यक्तिले सामान्य उपचारका लागि विदेश जान राज्यकोषबाट पैसा पाउने तर दीनदुःखी उपचारै गर्न नसकी मर्ने स्थितिको अन्त्य गर्न आफु लाग्पिर्ने बताए ।

सबै नेपालीको घरमा एउटा दुहुनु गाई हुनुपर्नेजस्ता विपीले देख्नुभएको सपनालाई नयाँ पुस्ताले अघि बढाउनुपर्ने उनको धारणा थियो ।

पूर्व सभामुख तारानाथ रानाभाटले विपीले देखाएको बाटोमा हिँड्न सकिएमा मात्रै उहाँप्रति सच्चा श्रद्धाञ्जलि गरेको ठहरिने विचार व्यक्त गरे।

नेपाली काँग्रेस कास्कीका सभापति कृष्णबहादुर केसीको अध्यक्षतामा भएको सो कार्यक्रममा काँग्रेस नेताहरु शुक्रराज शर्मा, खेमराज पौडेल र कोषाध्यक्ष लक्ष्मी पाण्डेले विपीले गरेका योगदानका बारेमा चर्चा गर्नु भएको थियो ।

मन्त्री थापाले आजै पोखराको फूलबारीमा रहेको मनिपाल शिक्षण अस्पतालको पनि निरीक्षण गरेका छन् । रासस

LEAVE COMMENT

Comment *
Your Name *
Email *
Website
 

Related Posts
Don't miss it
Editors choice