भोलि नेविसङ्घको निर्वाचन

काठमाडौँ, ३२ साउन । महाधिवेशन प्रतिनिधिको विवादले झन्डै १० दिन लम्बिएको नेपाल विद्यार्थी सङ्घको ११औँ महाधिवेशनअन्तर्गत भोलि बुधबार निर्वाचन हुनेभएको छ ।

मुलुकको सबैभन्दा ठूलो र पुरानो लोकतान्त्रिक पार्टी नेपाली काँग्रेसको भ्रातृ सङ्गठन नेविसङ्घको ११औँ महाधिवेशन पटक पटक मिति तोकिँदै स्थगन हुँदै नौ वर्षपछि यस पटक हुन लागेको हो ।

एघार जिल्लाको प्रतिनिधि विवादका कारण साउन २३ गते महाधिवेशन उद्घाटन भए पनि अन्य प्रक्रिया अवरुद्ध हुँदै आएको थियो ।

महाधिवेशनका लागि यही साउन २३ देखि २५ गतेसम्म राजधानीको भृकुटीमण्डप तोकिएको थियो । आजसम्म उद्घाटनबाहेक केही हुन सकेको छैन र निर्वाचन भने बन्दसत्र नभई पार्टी केन्द्रीय कार्यालय सानेपामा हँुदैछ ।

सङ्घको केन्द्रीय समिति प्रादेशिक संरचनाअनुसार १५१ सदस्यीय हुने गरी विधान प्रस्ताव गरिएको छ ।

सङ्घको निर्वाचन राम लक्ष्मण दाजुभाइले आविष्कार गरेको विद्युतीय भोटिङ मेसिनबाट हुँदैछ । निर्वाचन ४० मेसिनबाट हुने र मतपरिणाम दुई÷तीन घन्टाभित्रै आउने आविष्कार केन्द्रका अनुसन्धानकर्ता लक्ष्मण रिमालले बताएका छन् ।

निर्वाचन समितिले थोरै मतदाताले मतदान गर्ने क्षेत्र र समूहको भने मतपत्रमार्फत निर्वाचन गर्ने तयारी गरेको जनाएको छ । नेविसङ्घमा हालसम्म तीन हजार ७९० मतदाता निश्चित भइसकेको र अझै थपिने सम्भावना रहेको प्रमुख निर्वाचन अधिकृत खरेलले जानकारी दिए ।

उद्घाटनका बेला भृकुटीमण्डपमा भएको प्रचारप्रसारको चहलपहल अहिले सानेपामा सरेको छ । पार्टी कार्यालय जाने सडक उम्मेदवार र तिनका तुलले भरिएका छन् । पार्टीको प्रभावशाली भ्रातृ सङ्गठन भएकाले आफ्नो पक्षका विद्यार्थी जिताउन पार्टी नेतृत्व पङ्क्तिबीच प्रतिस्पर्धा देखिएको छ ।

उम्मेदवारको ताँती

केन्द्रीय निर्वाचन समितिका अनुसार अध्यक्ष पदमा मनोजमणि आचार्य, नैनसिंह महर, शुभराम बस्नेत, पदमराज पन्त, आनन्दराज त्रिपाठी, लक्ष्मण आचार्य नगेन्द्रसिंह ठकुरी, वचन कार्कीले उम्मेदवारी दिनुएका छन् ।

त्यसैगरी महामन्त्रीमा हिमालदत्त श्रेष्ठ, कुन्दनराज काफ्ले, सरोज थापा, दीपक भट्टराई, राजेश ज्ञवाली र शङ्कर पौडेलको उम्मेदवारी परेको छ । कोषाध्यक्षमा शिव रिमाल, अञ्जना अर्याल, केदार खनाल, टीका श्रेष्ठ र उमेश भट्टराईले उम्मेदवारी दिनुभएको प्रमुख निर्वाचन अधिकृत भरतप्रसाद खरेलले जानकारी दिनुभयो ।

यसबाहेक उपाध्यक्ष, सहमहामन्त्री र केन्द्रीय सदस्यमा गरी सयौँको उम्मेदवारी परेको छ । सङ्घमा १२९ पदका लागि ६८५ जनाको उम्मेदवारी परेको निर्वाचन समितिले जनाएको छ । समितिले आज साँझ ६ः३० बजेसम्म उम्मेदवारी फिर्ताको समय तोकेको छ । सङ्घको ११औँ महाधिवेशनअन्तर्गत मतदान भदौ १ गते बिहान ७ देखि साँझ ७ बजेसम्म काँग्रेस केन्द्रीय कार्यालय सानेपामा हुने तय भएको छ ।

कडा सुरक्षा घेरामा निर्वाचन

आफूलाई सबैभन्दा लोकतान्त्रिक पार्टी भनेर दाबी गर्ने काँग्रेसले भ्रातृ संस्थाको नयाँ नेतृत्वका लागि निर्वाचन भने कडा सुरक्षा घेरामा गर्दैछ । पार्टी कार्यालयमा हाल नेपाल प्रहरी र सशस्त्र प्रहरी गरी करिब ३०० भन्दा बढी प्रहरी तैनाथ छन् ।

आइतबार दिउँसो प्रतिनिधि विवादको विषयलाई लिएर असन्तुष्ट पक्ष पार्टी कार्यालयमा प्रवेश गर्न खोज्दा प्रहरी र विद्यार्थीबीच भएको झडपमा दर्जनौँ विद्यार्थी र सात जना प्रहरी घाइते भएका थिए ।

सुरक्षाकर्मीले हाल पार्टी कार्यालयमा छ वटा सिसिटिभी क्यामेराबाट कार्यालय वरपरको सबै दृश्य रेकर्ड गरिरहेको छ । पार्टीमा महाधिवेशन प्रतिनिधिको विवादलाई लिएर गुट÷उपगुटको कलह बढेकाले थप झडप हुन नदिन प्रहरीले उच्च सतर्कता अपनाएको जनाएको छ ।

नेविसङ्घ महाधिवेशनको जम्मा खर्च रु एक करोड ७८ लाख ८० हजार लाग्ने अनुमान गरिएको थियो तर महाधिवेशन लम्बिँदै गएपछि खर्च बढ्ने निश्चित छ । प्रवक्ता युपी लामिछानेका अनुसार महाधिवेशन लम्बिएका कारण दैनिक रु ४० लाख खर्चको भार थपिएको छ । (भीष्मराज ओझा)रासस

LEAVE COMMENT

Comment *
Your Name *
Email *
Website
 

Related Posts
Don't miss it
Editors choice